Rut 1 | KYG | STEP | Akeya'vilagamo agoti gemo ne'afiya vaya'mogimo Isaleli vaya'aite'mo yagai'a apate'nae. Ani afina'mo lusi kava hu'a ne'yafe'mo kafu hu'naya afina'mo afole ai'nigeno mago vekamo Metelehamu taonimo hanetegeno Yuta kotegamo mai'niya vekamo ataleno a'a'e mafa'ne'ala'e'mo apavaleteno hage'a u'a Movapu kotegamo mai'nae.

Ruth 1

Elimeleki'e afamo anaga a'e'mo Movapu kotegamo hage'a u'a mai'naya gemae

1 Akeya'vilagamo agoti gemo ne'afiya vaya'mogimo Isaleli vaya'aite'mo yagai'a apate'nae. Ani afina'mo lusi kava hu'a ne'yafe'mo kafu hu'naya afina'mo afole ai'nigeno mago vekamo Metelehamu taonimo hanetegeno Yuta kotegamo mai'niya vekamo ataleno a'a'e mafa'ne'ala'e'mo apavaleteno hage'a u'a Movapu kotegamo mai'nae. 2 Ani vekamo agi'amo Elimeleki'ae, a'amo agi'amo Neyomi'ae, mafa'ne'ala'mogani anaki'animo Maloni'e Kiliyoni'ene. Ani afamo anaga'mo Efalata nofi afamo anagane. 3 Apakaemo Movapu kotegamo u'a mai'ne'apae'mo Elimeleki'a ago falitege'apae'mo Neyomi'a agai'age'mo mafa'ne'ala'e'mo magokepi lokae'a mai'nae. 4 Lole mafa'nela'moganimo Movapu kote atala'mo alite'anae'mo mai'na'ae. Ani atala'ani anaki'animo Opa'e Luti'ene. Naya lole'a agufa kafugamo maite'apae'mo 5 Maloni'e Kiliyoni'e'mo ago fali'na'ae. Falita'ageno'ae'mo Neyomi'a anau'amo'mogi mafa'ne'alanagi hu'a ago falitageno'ae'mo agai'age'mo mai'niye.

Neyomi'a Luti'mo avalelino uno Metelehamu taonifi'mo mai'niya gemae

6 Neyomi'a Movapu kotega mai'neno'ae'mo afiyana Goti'a vaya'amo alagepa huno hapa mae'nigeno ne'ya'mo alagepa huno afole ai'niye, hu'a hu'naya gemo afi'niye. Agae'e anofelo'ala'mogani'e'mo visayafe'mo alo hu'nae. 7 Yuta kotega ugefe'mo kategamo magokepi lokae'a ne'u'apae'mo 8 Neyomi'a anakaefe'mo, Kotanilegamo aitana atagi netana itatanimogani'e'mo mai'ao. Alagepa kava'mo hutana yagaitana natetetana fali'na'a anautanila'mogani'e'mo alagepa hutana yagaitana anate'na'ae. Ani kava huno Goti'a alagepa kava huno yagaino lanatenagetana mai'ao. 9 Ala kava ne'mo'a alagepa huno lahana maenagetana utana alu vekalate'mo maitetana alagepa hutana mai'ao, huno hana paiteno hanaeno ne'nige'anae'mo lusi kava hu'ana avi'ya hu'na'ae. 10 Hute'anae'mo, ha'ao, Kagae'eke'mo lokaeta vayakalegamo ugune, hu'ana 11 ha pai'na'ageno'ae'mo, Nanofelo'nila'moganitanae, huno, afa'a atagi netana vi'ao. Na kava higetanae'mo nagae'e'mo magokepi lokaeta ugune, hutana neha'ae. Mago'e hu'na halate ve mafa'nela'mo ali'na anatesugetana ani vekalate'mo maiga'afiye. 12 Ha'ao, Ago anekalomo le'novanage'na vele'mo afa'a o'maiguvanagi ataletana aitana atagi netana kotanilegamo vi'ao. Hemeni hani'ilagamo vele'mo maite'na ve mafa'nela'mo ali'na anatesuge'ana 13 kosisa'afe'mo anakava maisa'afe'mo neha'afiye. Anakava o'maitana utana alu vekalate'mo maiga'ae. Ha'ao, kanale osugiye. Ala kava ne'mo'a nagaetegamo hosu kava'mo hu'nige'nae'mo nahau hu'na nelanatove, huno hana pai'niye. 14 Ani gemo hu'nige'ana afite'anae'mo mago'e hu'ana avi'ya hu'na'ae. Opa'a anofelo'amo'mo haeno neteno ataleno u'niya'monanafa Luti'a ataleno o'u'niye. 15 Neyomi'a Lutife'mo, Kaganakamo'mo ago kataleno nofi vaya'alega'e goti'amotega'e'mo u'niye. Agae'e'mo kotanilegamo vi'ao, huno ha pai'nigeno 16 Luti'a, nagaefe'mo, Nataleka uvo, huka osuvo. Nagae'e'mo lokaeka o'ugane, huka huteka huka natafauka o'nato. Haiya kotegamo visapi nagae'e'mo afa'age'mo ugu'ae. Haiya kotega uka maisapi nagae'e'mo uta'age'mo maigu'ae. Vayakamo vaya'nige'mo maigae. Gotikamo'mo Goti'nimoke'mo maigiye. 17 Haiya kotega uka mai'neka falisapi nagae'e'mo ani kotegamo u'na mai'ne'na falisuge'a ali'a ki'a nategae. Falisu'a kava'moke'mo la'agaemo alino fako huno la'ategaiye. Alagi lama gemo nehuve. Ani kava'mo osisuva'mo'mo Goti'a lusi kava huno hanageke ya'mo namigiye, huno huteno ago'ya atale'niye. 18 Luti'a lusi lokiya gemo huno, ugu'ae, huno ha pai'nigeno'ae'mo Neyomi'a ge osu'niye. 19 Anakaemo u'ana Metelehamu taonifi'mo ava'yi hu'na'age'apae'mo muki ani taonifi a'ne anaga'mogimo agete'apae'mo, Ani a kanomo Neyomi'a ne'efi, hu'a hute'a hapau ai'nae. 20 Neyomi'a, Nagaefe'mo Neyomiyo, hutapa nagi o'aeyo. Ala kava ne'mo'a nagaetegamo hosu kava'mo hu'niya'mofe'mo Mala'ae, hutapa nagi aeyo, huno hapa pai'niye. (Neyomi'ae agimo aepa'amo amogaga ne'aiya ane. Mala'ae agimo aepa'amo hosu aipamo nekaliya ane.) 21 Neyomi'a, Mani koteti'mo atale'na u'nova afina'mo anau'nimo'e mafa'ne'nila'e'mo magokepi lokaeta u'none. Muki ya'nimo alini'na u'nova'monanafa Ala kava ne'mo'a navalelino ege'na nagufa'age'mo ne'ove. Ala kava ne'mo'a lusi kava huno hanageke ya'mo alino nami'niya'mofe'mo Neyomi'a amogaga ne'aiya a kanoe hutapa nagi o'aeyo, huno hapa pai'niye. 22 Ani kava hu'ana Neyomi'e anofelo'amo'mo Movapu kotega a kanomo Luti'e'mo Movapu kotegati'mo e'ana mali ne'ya'mo laisigana ya'mo ago le'nige'a nehatagaya afina'mo Metelehamu taonifi'mo e'ana ava'yi hu'na'ae.